༄།།རྒྱལ་ཞེན་ལྷག་བསམ་གྱིས་ཕྱུག་པའི་བོད་ཀྱི་གཞོན་ནུ་ལྷན་ཚོགས་དང་ཡོ་རོབ་བོད་རིགས་གཞོན་ནུ་ཚོགས་པའི་རྒྱུན་ལས་ཟུར་པ་ཡོངས་ཀྱི་སྙན་ལམ་དུ།
ཆེད་ཞུ།།
འདས་པའི་སྤྱི་ལོ་༢༠༡༩ཟླ་བ་༡༢པའི་ནང་བོད་ཀྱི་གཞོན་ནུ་ལྷན་ཚོགས་ཀྱི་དབུས་རྒྱུན་ཟུར་པ་འགའ་ཤས་དང་། སྤྱི་ཚོགས་དྭང་བླངས་ཀྱི་ལས་བྱེད་དེ་བཞིན་ཨེ་ཤེ་ཡ་རང་དབང་རླུང་འཕྲིན་ཁང་དང་ཨ་རིའི་བོད་ཀྱི་རླུང་འཕྲིན་ཁང་གི་གསར་འགོད་པ་སོགས་བོད་མི་བཞི་བཅུ་ལྷག་ལྷན་འཛོམས་ཀྱིས་བོད་ཀྱི་མ་འོངས་པའི་སྐོར་ཆུ་ཚོད་གསུམ་ལྷག་རིང་དོན་ཕན་ལྡན་པའི་བགྲོ་གླེང་ལྷུག་པོ་གནང་ཡོད།
བོད་དོན་ལ་ཐུགས་སྣང་ཆེ་བའི་བོད་མི་བཞི་ཅུ་ལྷག་གིས་སྒེའུ་ཁུང་མེད་པའི་ཚོགས་ཁང་ཆུང་ཆུང་ཞིག་ནང་དུས་ཡུན་ཆུ་ཚོད་གསུམ་ལྷག་རིང་བགྲོས་གླེང་ལྷུག་པོར་གནང་ནས་འཇུག་འབྲས་ཤིན་ཏུ་ཡག་པོ་བྱུང་ཡོད། གྲོས་བསྡུར་བ་འགའ་ཤས་ཀྱིས་དེ་ལྟ་བུའི་བརྗོད་གཞི་གལ་ཆེན་སྐོར་བགྲོ་གླེང་ལྷུག་པོ་བྱེད་རྒྱུ་བྱུང་བ་ནི་ཧ་ལམ་དཀོན་ལ་དུས་ཡུན་རིང་པོའི་རྗེས་སུ་ཐེངས་དང་པོ་ཡིན་པའི་དགོངས་ཚུལ་ཟབ་ལ་ཐུགས་ཚོར་ཆེན་པོའི་གཏམ་བཤད་གནང་སོང་། གྲོས་བསྡུར་དེའི་སྐབས་ཡ་མཚན་ནམ་བསྔགས་བརྗོད་བྱེད་དགོས་པ་གཅིག་ནི་ཚང་མས་མ་འོངས་པའི་བོད་ཀྱི་སྐོར་བགྲོ་གླེང་དང་དགོངས་ཚུལ་གསུངས་རེར་བྱས་པ་ལས་རྒྱུན་ལྡན་གྱི་རྩོད་གླེང་སྟེ་ལམ་དབུ་མ་དང་རང་བཙན། བློ་བཟང་སེང་གེ་དང་སྤེན་པ་ཚེ་རིང་སོགས་ཀྱི་སྐོར་རྩ་བ་ནས་གླེང་ལོང་བྱུང་མེད་པ་དེ་ཡིན།
འདས་པའི་བགྲོ་གླེང་ནི་དོན་འབྲས་ལྡན་པའི་ངང་ལེགས་བསྒྲུབས་བྱུང་ཡོད། དེས་ན་གྲུབ་འབྲས་ལྡན་པའི་ལེགས་བྱང་ངམ་གནད་དོན་འགའ་ཞིག་སྐོར་སྤྱི་ཟླ་ ༠༣ ཚེས་ ༠༨ ཉིན་ཡོ་རོབ་སུད་སི་ས་གནས་ཛུ་རིག་གི་བགྲོ་གླེང་སྐབས་སྙན་གསེང་དང་འགྲེལ་བརྗོད་ཞུ་རྒྱུ་ཡིན། མ་ཟད་མུ་ཐུད་དེ་གནད་དོན་དེའི་ཐད་གོ་བསྡུར་དང་ཡར་རྒྱས་གཏོང་རྒྱུ་ཡིན། མགྲོན་བརྡ་འདི་ལ་མིང་རྟགས་འཁོད་རོགས་དང་བོད་གཞོན་ནུ་ལྷན་ཚོགས་ཀྱི་སྤྱི་ཁྱབ་དྲུང་ཆེ་ཟུར་པ་ད་ལྟ་ཨ་རིའི་སིའ་ཊལ༼Seattle, USA༽ གནས་བཞུགས་སྐུ་ཞབས་བཀྲིས་རྣམ་རྒྱལ་ཡང་འདུ་འཛོམས་འདིར་མཉམ་བཞུགས་གནང་གིན་ཡོད།
ང་ཚོས་འབྲེལ་ཡོད་མི་སྣ་ཙམ་དུ་མ་ཟད་འདོད་མོས་མཆིས་པའི་རྒྱ་ཆེའི་བོད་རིགས་ཡོངས་ལ་ སྤྱི་ལོ་༢༠༢༠ཟླ་༠༣ཚེས་༠༨ ཉིན་གྱི་བགྲོ་གླེང་འདིར་མཉམ་བཞུགས་དང་སོ་སོའི་དོན་སྙིང་ལྡན་པའི་དགོངས་ཚུལ་ལྷུག་པོ་གནང་རྒྱུར་འབོད་བསྐུལ་དང་མགྲོན་འབོད་ཞུ་རྒྱུ་ཡིན།
=> བགྲོ་གླེང་ནང་མཉམ་ཞུགས་སམ་མིང་ཐོ་འདི་ནས་འགོད་ཐུབ།
གོང་དུ་ཞུས་པ་བཞིན་ང་ཚོའི་བྱེད་སྒོ་འདིའི་དམིགས་ཡུལ་ནི་གལ་ཆེའི་གནད་དོན་ཞིག་ཡིན། སྤྱི་ལོ་༢༠༢༠ ནང་བོད་ཀྱི་གཞོན་ནུ་ལྷན་ཚོགས་དབུ་བརྙེས་ནས་མི་ལོ་ཧྲིལ་པོ་༥༠འཁོར་བའི་དུས་དྲན་སྲུང་བརྩི་ཞུ་རྒྱུ་རེད་།དུས་བཟང་དེ་དང་སྟབས་བསྟུན་ནས་ང་ཚོས་བོད་དང་བོད་མིའི་མ་འོངས་པར་རྒྱང་ལྟའི་བསམ་ཞིབ་བྱ་རྒྱུ་དང་། ༧གོང་ས་༧སྐྱབས་མགོན་ཆེན་པོ་མཆོག་མ་བཞུགས་པའི་དུས་སྐབས་སུ་ང་ཚོ་བོད་རིགས་སྤྱི་དང་བོད་རྒྱལ་ཁབ་ལ་དཀའ་ངལ་དུ་མ་ཞིག་འཕྲད་སྲིད་པས་དེ་དག་ལ་གདོང་ལེན་བྱ་ཕྱོགས་དང་། མི་རིགས་སྤྱི་ལ་ཕན་ཐོགས་ངེས་ཀྱི་སྙིང་སྟོགས་ཅན་གྱི་བསམ་ཚུལ། ལྟ་བ་དང་རིག་་པ་གསར་པ་ཞིག་ བློ་གྲོས་ལྡན་པ་གཉིས་འགྲོགས་ན་བརྙེས་སྲིད་པས་ང་ཚོས་ལོ་འདིར་འདུ་འཛོམས་བསྐོངས་རྒྱུའི་དམིགས་ཡུལ་ཡང་དེ་ཉིད་ཡིན། ང་ཚོས་ལྷན་རྒྱས་མང་དག་ཞིག་འདུ་འཛོམས་འདིར་མཉམ་བཞུག་གནང་རྒྱུའི་ཡིད་ཆེས་བྱེད་བཞིིན་ཡོད། མ་ཟད་ལྷན་རྒྱས་ནས་ཀྱང་བགྲོ་གླེང་འདིའི་སྐོར་གྱི་མགྲོན་བརྡ་རྒྱུད་སྐུར་གང་མང་གནང་རོགས།
གུས་འདུད་དང་བཅས་ཟླ་ ༢ ཚེས་ ༢ བཟང་པོར།
བཀྲིས་རྣམ་རྒྱལ་དང་དབང་པོ་བཀྲས་མཐོང་ནས་ཕུལ།
