ཨ་རིའི་རྒྱལ་སའི་ཁུལ་དང་། ཧྥ་རན་སིའི་ཕེ་རི་སི་གྲོང་ཁྱེར། ཨ་རིའི་ནིའུ་ཡོག་གྲོང་ཁྱེར་བཅས་སུ་བོད་ཀྱི་མདུན་ལམ་བཞུགས་མོལ་ལྷན་ཚོགས་ཐེངས་གསུམ་ཚོགས་པ་ཧ་ཅང་གྲུབ་འབྲས་ལྡན་པ་བྱུང་ཡོད་པ་དང་། ད་ཆ་བོད་ཀྱི་མདུན་ལམ་བཞུགས་མོལ་ལྷན་ཚོགས་ཐེངས་བཞི་པ་དེ་རྒྱ་གར་རྡ་རམ་ས་ལར་སྤྱི་ལོ་ ༢༠༢༣ ཟླ་ ༡༡ ཚེས་ ༥ ནས་ ༡༠ བར་ཚོགས་གཏན་ཁེལ་ཡོད།
བོད་ཀྱི་མདུན་ལམ་ནི་བོད་དོན་ལ་སེམས་ཁུར་ཆེ་བའི་བོད་ཀྱི་སྤྱི་དམངས་ཁག་གཅིག་ནས་མ་སྐུལ་དང་བླངས་ཀྱིས་སྤེལ་བའི་ལས་འགུལ་ཞིག་ཡིན། ལས་འགུལ་འདིར་ཆབ་སྲིད་ལངས་ཕྱོགས་དང་། ཕ་མོ། ཆོལ་ཁ། ལུང་ཚན་སོགས་ཀྱི་དབྱེ་བ་མེད་པར་བོད་ཀྱི་མ་འོངས་པའི་མདུན་ལམ་ཆེད་དུ་བགྲོ་གླེང་སྦྱང་བཤད་བརྒྱུད་དེ་བོད་མིའི་ཆིག་སྒྲིལ་དང་། འགན་ཁུར། ནུས་སྟོབས། གྲ་སྒྲིག་བཅས་གོང་སྤེལ་ཚགས་ཚུད་ཡོང་ཐབས་ལ་དམིགས་པ་ཞིག་ཡིན། ལས་འགུལ་གོ་སྒྲིག་བྱེད་མཁན་ནི་བོད་ཕྱི་ནང་གི་སྤྱི་ཚོགས་དང་ཁོར་ཡུག་འདྲ་མིན་ནང་ཚར་ལོངས་བྱུང་ཞིང་། གཞུང་དང་གཞུང་འབྲེལ་མ་ཡིན་པ་སོགས་ལས་རིགས་འདྲ་མིན་ནང་ལས་ཀ་བྱེད་མྱོང་བའི་ཕོ་མོ་དང་རྒན་གཞོན་དབྱེར་མེད་ལས་གྲུབ་པ་ཞིག་ཡིན། ང་ཚོའི་དབར་ཆབ་སྲིད་ཀྱི་ལངས་ཕྱོགས་ཐད་བསམ་ཚུལ་འཛིན་སྟངས་མི་འདྲ་བ་ཡོད་ན་ཡང་། ང་ཚོས་རིགས་མི་འདྲ་བའི་སྟོབས་ཤུགས་དང་ཆིག་སྒྲིལ་གྱི་ནུས་སྟོབས་ལ་ཡིད་ཆེད་བྱེད་ཀྱི་ཡོད་ལ། དངོས་ཐོག་བདེན་འཚོལ་གྱི་བགྲོ་གླེང་དང་སྦྱང་བཤད་ཀྱི་རིན་ཐང་ལ་ཡིད་ཆེད་བྱེད་ཀྱི་ཡོད། ལྷག་པར་དུ་རྒྱལ་སྤྱིའི་ཆབ་སྲིད་ཀྱི་འགྱུར་བ་དང་རྒྱ་ནག་གི་ཆབ་སྲིད་གནས་སྟངས་སོགས་ཕྱོགས་གང་ས་ནས་བོད་ཀྱི་མ་འོངས་པའི་མདུན་ལམ་དང་རྩ་དོན་འཐབ་རྩོད་ཀྱི་ལས་དོན་ཛ་དྲག་གི་དུས་སྐབས་སུ་བསླེབས་པའི་ཚོར་སྣང་ཡོད་མཁན་གཅིག་མཚུངས་ཡིན།
བོད་ཀྱི་མ་འོངས་པའི་མདུན་ལམ་ཁ་ཕྱོགས་ཇི་འདྲ་ཞིག་ཏུ་སྐྱོད་མིན་ནི་ང་ཚོས་གནས་ལུགས་དང་གཏན་ཚིག་ལས་གྲུབ་པའི་དཔྱད་ཞིབ་དང་འཆར་གཞི་སྒྲིག་ཐུབ་མིན་ལ་རག་ལུས་ཡོད། གལ་སྲིད་ཁྱེད་རང་ལོ་ན་ ༡༨ སོན་ཞིང་བོད་ཀྱི་སྤྱི་ཚོགས་དང་། ཆབ་སྲིད། སྐད་ཡིག རིག་གཞུང་སོགས་ལ་ཐུགས་སྣང་ཡོད་མཁན་ཞིག་ཡིན་ཚེ་ལྷན་ཚོགས་འདིར་མཉམ་ཞུགས་ཀྱིས་བགྲོ་གླེང་སྦྱང་བཤད་ལ་ཆ་ཤས་ལེན་རྒྱུར་རེ་སྐུལ་ཞུ་བཞིན་ཡོད། ལྷན་ཚོགས་ཉིན་ལྔའི་རིང་ཚོགས་བཅར་བ་རྣམ་པས་བོད་རྒྱལ་ཁབ་དང་བོད་མིའི་མང་འོངས་པའི་བདུན་ལམ་ཆེད་དུ་དོན་སྙིང་ལྡན་པའི་བརྗོད་གཞི་མང་པོར་བགྲོ་གླེང་ལྷུག་པོ་བྱ་ཐུབ་རྒྱུ་མ་ཟད། རྣམ་དཔྱོད་ལྡན་པའི་གསུང་བཤད་གནང་མཁན་དང་གཟབ་ཁྲིད་གནང་མཁན་ཚོ་དང་ལྷན་དུ་ཡང་སྦྱང་བཤད་གོ་བསྡུར་ལྷུག་པོ་གནང་སྟེ་ཕན་ཚུན་བློ་སྐྱེད་སྤེལ་ཐུབ་རྒྱུའི་གོ་སྐབས་ཡོད།
བགྲོ་གླེང་བྱ་རྒྱུའི་བརྗོད་གཞི་ཁག་གཅིག་ནི་བོད་དང་། རྒྱ་ནག རྒྱ་གར་བཅས་ཀྱི་ཡུལ་བབ་སྲིད་བྱུས་དང་། བོད་མིའི་ཆིག་སྒྲིིལ། བོད་མིའི་ངོ་བོ། ས་གནས་དང་མི་རབས་མི་འདྲ་བའི་བོད་མིའི་འབྲེལ་ལམ། དེ་བཞིན་མ་འོངས་པར་ང་ཚོས་གདོང་ལེན་བྱེད་དགོས་སྲིད་པའི་བོད་ཀྱི་གནད་དོན་གལ་ཆེན་ཁག་གཅིག་ཀྱང་ཚུད་ཡོད།
ཚོགས་འདུའི་དམིགས་བསལ་གྱི་གཙོ་དོན་མཚོན་བྱེད་ནི་ (སོན་རྩ།) ཡིན་པས་སྒྱུ་རྩལ་གྱི་རྣམ་པའི་ཐོག་ནས་ཀྱང་གཙོ་དོན་ལ་ཆ་ཤས་ལེན་རྒྱུའི་གོ་སྐབས་ཡོད།
མཉམ་ཞུགས་གནང་མཁན་ཚོས་གཤམ་གྱི་དྲ་ཐག་བརྒྱུད་ངེས་པར་དུ་ཐོ་འགོད་གནང་རོགས། https://forms.gle/hs8dA26ZG5ym5iCM9
ཐོ་འགོད་ཀྱི་དུས་ཚོད་མཐའ་མ་ནི་སྤྱི་ལོ་ ༢༠༢༣ ཟླ་ ༩ ཚེས་ ༡༥ ཡིན།
ང་ཚོགས་དོགས་འདྲི་གནང་དགོས་པ་བྱུང་ཚེ་ཐོག་མར་བོད་ཀྱི་མདུན་ལགམ་གྱི་དྲ་ཐོག་ནས་རྒྱུན་གཏན་གྱི་དྲི་བའི་ལན་འདེབས་ཁག་ལ་ཞིབ་གཟིགས་གནང་རོགས།
https://future-of-tibet.org/en/dharamsala-conference-faqs/
ཡོང་རྒྱུའི་གསར་གནས་ཚང་མ་མཁྱེན་རྟོགས་ཡོང་སླད་ང་ཚོའི་ཡིག་འབྲེལ་མཚན་གཞུང་ནང་ཐོ་འགོད་གནང་རོགས། https://future-of-tibet.org/en/home/about-us-contact/sign-up-to-our-mailing-list/
