བོད་ཀྱི་མདུན་ལམ་ལས་འགུལ་ནི་སྤྱི་ལོ་ ༢༠༢༠ ལོར་བོད་ཀྱི་གཞོན་ནུ་ལྷན་ཚོགས་དང་ཡུ་རོབ་བོད་ཀྱི་གཞོན་ནུ་དབུ་བརྙེས་ནས་ལོ་ངོ་ ༥༠ ཧྲིལ་པོ་འཁོར་བ་དང་བསྟུན། མིག་སྔའི་རྒྱ་ནག་དང་རྒྱལ་སྤྱི། བོད་ཀྱི་གནས་སྟངས་སོགས་ལ་བསམ་གཞིགས་ཀྱིས་རྒྱལ་སྤྱིའི་ནང་བོད་ཀྱི་རྩ་དོན་འཐབ་རྩོད་ཀྱི་ནུས་སྟོབས་གོང་སྤེལ་གཏོང་ཐབས་སུ་་ཐོག་མར་འགོ་འཛུགས་ཞུས་པ་དང་། བོད་ཀྱི་གཞོན་ནུ་ལྷན་ཚོགས་ཀྱི་དབུས་རྒྱུན་ཟུར་པ་མང་པོས་རྒྱབ་སྐྱོར་གནང་ཡོད།
ད་ལྟའི་འཆར་ལས་འགུལ་སྣེ་ཁྲིད་བྱེད་མཁན་བདུན་ཡོད་པ་རྣམས་ནི་བོད་དང་། རྒྱ་གར། ཡུ་རོབ། ཨ་རི་སོགས་སྤྱི་ཚོགས་དང་ཁོར་ཡུག་འདྲ་མིན་ནང་ཚར་ལོངས་བྱུང་ཞིང་། བོད་ཀྱི་གཞོན་ནུ་ལྷན་ཚོགས་དང་ཡུ་རོབ་གཞོན་ནུ། བཙན་བྱོལ་བོད་མིའི་སྒྲིག་འཛུགས་སོགས་སུ་ཞབས་ཞུ་སྒྲུབ་་མྱོང་བ་ཞིག་ཡིན། ང་ཚོའི་དབར་ཆབ་སྲིད་ཀྱི་ལངས་ཕྱོགས་ཐད་བསམ་ཚུལ་འཛིན་སྟངས་མི་འདྲ་བ་ཡོད་ནའང་། བོད་སྤྱིའི་འགན་འཁུར་དང་གཞོན་ནུའི་འགོ་ཁྲིད་ཀྱི་འདས་པའི་ཉམས་མྱོང་དང་རེ་བའི་རྨི་ལམ་བཅས་ལ་ལྟ་ཚུལ་གཅིག་གྱུར་ཡོད་པ་དང་། ད་ཆ་རྒྱ་ནག་དང་རྒྱལ་སྤྱིའི་ཆབ་སྲིད་གནས་སྟངས། བོད་ཀྱི་གནད་དོན་དང་རྩ་དོན་འཐབ་རྩོད་ཀྱི་གནས་སྟངས་སོགས་ཕྱོགས་གང་ས་ནས་ང་ཚོའི་རྩ་དོན་སྔར་ལས་ཛ་དྲག་ཆེ་རུ་སོང་བའི་ཚོར་སྣང་ཆེན་པོ་ཡོད་མཁན་ཡང་གཅིག་མཚུངས་ཡིན།
བོད་དང་བོད་མིའི་ལས་དབང་ལ་སེམས་ཁུར་ཆེ་བའི་སྤུན་ཟླ་སུ་ཡིན་ཡང་ང་ཚོ་མཉམ་དུ་འགན་ཁུར་བཞེས་རྒྱུར་རེ་བ་དང་བགའ་བསུ་ཞུ་རྒྱུ་ཡིན།
